
Helen
- Elisa Capdevila (Elisa Capdevila)
Elisa Capdevila continúa nesta obra coa súa liña de traballo, na que acostuma representar imaxes baseadas na súa realidade máis cotiá. Elisa, neste caso, déixanos este mural que evoca un momento de introspección e silencio, elementos que estiveron especialmente presentes na vida de moitos/as de nós nos meses de confinamento por mor da pandemia provocada pola COVID-19.
A composición representa unha imaxe apracible, tranquila e cotiá, que alude á seguridade do fogar, xerando esa atmosfera a través dunha luz tenue e intimista no tratamento do espazo. Isto contrasta coa figura que destaca polo traballo da luz, máis cálida e intensa, e que nos fai levar a mirada cara ao personaxe principal. Este mural pode visitarse na Rúa Venezuela, nº 24.