Eu vivo nun bote no medio do mar
- Lola Oviedo (Lola Oviedo)
Lola Oviedo naceu e vive en Caión. Dende alí pode ver o mar a diario e os barcos que, por esta nosa autoestrada oceánica, se dirixen aos máis distintos confíns do mundo. O que non pode ver, porén, é a costa carballesa, Razo e sobre Baldaio, a quen Lola considera o noso Serengueti.
A obra, segundo a autora, pretende narrar a paisaxe visual do mar desde Carballo, se iso fose posible, e os seus edificios. Con liñas minimalistas, no seu mural, nas paredes do pavillón Carballo Calero, representa á vista da costa carballesa dende un punto elevado, poñamos por caso, dende o Monte Neme. Nela recóllese unha viaxe que percorre as corredoiras que nos levan cara o mar por Lema, a lagoa de Baldaio, o inmenso Atlántico, o porto de Caión á dereita e o de Malpica á esquerda.
O mural pretende ser unha mirada sobre o areal de Baldaio, Caión a un lado, Malpica ao outro, e os camiños que aló nos conducen… Unha mirada á parte norte da Costa da Morte, aos barcos que ata non hai moito poboaban esta parcela de Océano convulso e frondoso.
